Autoritetet e shëndetësisë në Maqedoninë e Veriut njoftojnë se deri më 26 Shtator, me një dozë të vaksinës kundër COVID-19 janë vaksinuar 46.9% e popullatës mbi 18 vjeç. Tek personat mbi 40 vjeç përfshirja me një dozë të vaksinës është 55%, kurse tek grupmosha 18 – 39, është 31%.
Ohri me 63.9% është qyteti me më shumë të vaksinuar me dozën e parë, kurse Kumanova, Dibra, Gostivari, Strumica, Vinica, Kratova dhe Radovishi janë në fund të listës me mesatare 30 deri 40% të vaksinimeve.
Nga e Hëna, nisi vaksinimi me dozën e tretë, ku Komiteti për Imunizim rekomandoi që ta marrin qytetarët mbi 60 vjeç, punonjësit e shëndetësisë dhe të sëmurit kronik. Gjatë se Hënës, me dozën e tretë përforcuese janë injektuar 69 qytetarë.
Në Maqedoninë e Veriut, sipas të dhënave të MSH-së, deri tani janë aplikuar mbi 1.5 milionë vaksina, prej të cilëve mbi 721 mijë kanë marrë dy doza të vaksinës.
Konform të dhënave të autoriteteve të shëndetësisë, në vend janë 12.017 raste aktive me koronavirus. Shkupi, Kumanova e Tetova janë në krye të listës me raste aktive. Deri tani, 6.607 qytetarë kanë humbur betejën me Covid-19.