Rritja e nivelit te ujit ka bërë që lumi Vjosë të dalë nga shtrati gjatë natës. Disa banesa në fshatin Fitore janë përmbytur nga vërshimi i ujërave. Banorët thonë se situata është e përsëritur ndërsa akuzojnë autoritetet për mosmarrje masash.
Situatë e vështirë paraqitet dhe pranë urës së Mifolit ku dhjetëra banesa rrezikojnë përmbytjen ndonëse niveli i lumit Vjosa ka pësuar një rënie të lehtë gjatë orëve të fundit.
Probleme nga shirat ka patur dhe në qarkun Durrës, ku si pasojë e daljes nga shtrati të lumit Erzen janë mbuluar nga uji dhjetëra banesa në Sukth.
Ndërkohë në Elbasan prurjet e Shkumbinit janë rritur ndjeshëm, ndërsa janë përmbytur tokat bujqësore në fshatin Muriqan.
Nga ana tjetër rrëshqitjet e dherave dhe gurëve kanë shkaktuar vështirësi në lëvizjen e mjeteve në disa akse kombëtare.