Ministria e Mbrojtjes ka reaguar në lidhje me zjarret në vend.
Ministria shprehet se në bashkitë e Finiqit dhe Delvinës situata paraqitet më problematike.
Njoftimi i Ministrisë së Mbrojtjes:
Prej ditësh forcat e emergjencave civile, ndihmuar nga efektivë të Forcave të Armatosura janë në betejë me vatrat e zjarrit.
Në bashkitë e Finiqit dhe Delvinës situata paraqitet më problematike, për shkak të bimësisë së dendur, por fatmirësisht flakët janë mbajtur larg banesave.
Në këto ditë me temperatura ekstreme, kur edhe vendet e rajonit po përballen me zjarret, me rëndësi është bashkëpunimi mes pushtetit vendor, banorëve dhe strukturave të emergjencave civile. Ministri Pirro Vëngu bashkë me drejtorin e Agjencisë Kombëtare të Mbrojtjes Civile ndoqën nga afër punën e forcave në fshatin Mesopotam.
Përparësi janë jetët e njerëzve, siguria e personelit, i cili ka tashmë dy muaj i angazhuar në shuarjen e vatrave të zjarrit. Nuk duhet të harrojmë: Parandalim, parandalim, parandalim!
AKMC, është në komunikim të vazhdueshëm edhe me Drejtorinë e Përgjithshme të Emergjencave Civile në Bruksel në rast se do të jetë nevojë për të kërkuar ndihmë nga vendet partnere.