Kandidati i koalicionit Bashkë Fitojmë për Bashkinë e Tiranës Belind Këlliçi është zotuar në çelje të fushatës se do të ofrojë3 transportin publik falas.
Sipas tij, ky premtim është 100% i realizueshëm, teksa shton se kjo gjë kushton vetëm 6.8% e buxhetit të Bashkisë.
“Këtë ofroj unë, vërtetësi, mirësi, besnikëri, ndihmë, zgjidhje. Unë jam i pari që besoj në premtimet që kam dhënë, dhe a e dini pse? Sepse janë të gjitha të arritshme, 100% të realizueshme. Jam i lumtur veç kur e mendoj që 200 mijë banorë që udhëtojnë çdo ditë me urban, nuk do të paguajnë më. Me këto rroga e pensione, ato para do t’ju duhen në xhep. Minimalisht 52 mijë lekë më shumë në muaj, do ti keni në xhepat tuaj dhe kjo jo vetëm 1 muaj para zgjedhjeve, por çdo muaj, për 4 vite me radhë. U them gjimnazistëve, studentëve, pensionistëve dhe të gjithëve ju që për të njëjtin shërbim mizerabël, jua rritën biletën në 400 lekë: Autobusi do të jetë pa pagesë! Kushton vetëm 6.8% të buxhetit të bashkisë. Taksat tona nuk do t’i marrin më bosat e inceneratorëve. Ju nuk do të mbani më me para ata që janë në kërkim nga drejtësia. Financimi i inceneratorit imagjinar të Tiranës do të ndërpritet urgjentisht! Jo 70 e 80 mijë euro në ditë, por as 400 lekë biletë autobusi nuk do ju marrin më!”
Këlliçi më tej u zotua se do të arrijë të sigurojë edhe ujin 24 orë në Tiranë.
Të heqin depozitat nga tarracat ishte një tjetër premtim, që Këlliçi kërkon votëbesimin e qytetarëve të Tiranës për ta realizuar.
“I kemi ndarë problematikat në dy kategori, brenda shtëpisë dhe jashtë pragut të saj. Uji është problemi më i madh që kemi në shtëpitë tona. Çmimin na e rritën me 44%, por uji vazhdon të vijë me orar të kufizuar dhe nuk plotëson asnjë standard për konsum të shëndetshëm. Objektivi im është t’i heq Tiranës depozitat e ujit mbi tarraca. Për këtë më duhet mbështetja juaj dhe gjykimi i ekspertëve”.
Këlliçi foli edhe për trafikun që krijohet në Tiranë, për të cilin tha se do ta reduktojë përmes projektit të tij për të bërë një nënkalim në sheshin Skënderbej.