Mbajtja e maskave është masa e vetme më efektive e shëndetit publik në trajtimin e Covid-it, duke reduktuar incidencën me 53%, tregon studimi i parë global i këtij lloji.
Vaksinat janë të sigurta dhe efektive dhe shpëtojnë jetë në mbarë botën. Por shumica nuk sigurojnë mbrojtje 100%, e shumica e vendeve nuk i kanë vaksinuar të gjithë dhe nuk dihet ende nëse vaksinat do të parandalojnë transmetimin e ardhshëm të varianteve të reja të koronavirusit.
Në nivel global, rastet me Covid-19 kaluan 250 milionë këtë muaj. Virusi ende po infekton 50 milionë njerëz në mbarë botën çdo 90 ditë për shkak të variantit shumë të transmetueshëm Delta, e me mijëra që vdesin çdo ditë.
Një rishikim sistematik dhe meta-analizë e ndërhyrjeve jo farmaceutike ka gjetur për herë të parë se mbajtja e maskës është konsideruar më efektivja për Covid-19.
“Ky rishikim sistematik dhe meta analizë tregon se disa masa mbrojtëse personale dhe sociale, duke përfshirë larjen e duarve, mbajtjen e maskave dhe distancimin fizik janë të lidhura me reduktimin e incidencës së Covid-19,” shkruajnë studiuesit në revistën “The BMJ”.
Ata thanë se rezultatet theksojnë nevojën për të vazhduar mbajtjen e maskave, distancimin social dhe larjen e duarve së bashku me programet e vaksinave. Studiuesit në Universitetin Monash dhe Universitetin e Edinburgut thonë se masat e shumanshme, të tilla si bllokimet dhe mbylljet e kufijve, shkollave dhe vendeve të punës kanë nevojë për analiza të mëtejshme për të vlerësuar efektet e tyre të mundshme negative mbi popullsinë.
Ndërhyrjet e shëndetit publik jo farmaceutike dihet se janë të dobishme në luftimin e infeksioneve të frymëmarrjes si gripi dhe vendet në mbarë botën janë përpjekur t’i përdorin ato për të frenuar përhapjen e Covid-19. Sidoqoftë, deri më tani, rishikimet nuk kanë qenë mjaft të forta për t’i lejuar ekspertët të nxjerrin përfundime të qëndrueshme në lidhje me efektivitetin e masave të tilla në trajtimin e Covid-19.
Rezultatet nga më shumë se 30 studime nga e gjithë bota u analizuan në detaje. Ato treguan se mbajtja e maskës ka reduktuar incidencën e Covid-19 deri në 53% dhe distanca fizike ka çuar në një reduktim me 25%.
Analiza e detajuar nuk ishte e mundur për masat e tjera, duke përfshirë karantinën dhe izolimin, bllokimet universale dhe mbylljet e kufijve, shkollave dhe vendeve të punës, për shkak të ndryshimeve në dizajnin e studimit, masat e rezultateve dhe cilësinë, thanë studiuesit. Mbajtja e maskave u miratua nga shumë vende në fillim të pandemisë, por gati dy vjet më vonë shumë prej tyre tani kanë hequr disa nga masat.
“Ne e dimë se mbajtja e një maskë për fytyrën, distanca dhe higjiena redukton rrezikun. Ne duhet t’i bëjmë të gjitha dhe nuk duhet të mbështetemi vetëm tek vaksinimi”, shkruajnë ekspertët.(The Guardian, “Si”)