Një ditë pasi aktori dhe modeli, Sam Asghari dorëzoi dokumentet për t’u ndarë ligjërisht nga fituesja e Grammy-t Britney Spears pas 14 muajsh martesë, ai ka folur për ndarjen e tyre.
“Pas 6 vitesh dashuri dhe përkushtim ndaj njëri-tjetrit, unë dhe gruaja ime kemi vendosur të përfundojmë rrugëtimin tonë së bashku. Ne do të mbajmë dashurinë dhe respektin që kemi për njëri-tjetrin dhe i uroj asaj gjithmonë më të mirën. Të kërkosh privatësi duket qesharake, kështu që unë thjesht do të kërkoj që të gjithë, përfshirë mediat, të jenë të sjellshëm”.
Burime për ‘TMZ’ thonë se Sam është ankuar për dhunë fizike ndaj Britney duke thënë se kjo e fundit në një rast e ka goditur atë me grusht ndërkohë që ai flinte në shtratin e tyre.
Sa i përket Britneyt, ajo ende nuk e ka komentuar ndarjen publikisht. Më 16 gusht një burim konfirmoi ndarjen për “NBC News” duke theksuar se ndarja është “më e mira për Britney”.
Sam dorëzoi dokumentet për t’i dhënë fund martesës zyrtarisht vetëm disa orë pasi raportet e ndarjes u shfaqën më 16 gusht, duke përmendur “dallimet e papajtueshme” si arsyen e ndarjes në një dosje të siguruar nga “E! News”.
Në dokumente, 29-vjeçari ka kërkuar gjithashtu që këngëtarja e “Womanizer” të paguajë tarifat e mbështetjes bashkëshortore dhe avokatit, por ka deklaruar edhe se “duhet të përcaktojë ende natyrën dhe masën e plotë të pasurive dhe detyrimeve të veçanta pronësore të secilës palë”.
“E! News” ka kontaktuar me përfaqësuesit dhe avokatët e Britney dhe Sam për koment, por nuk ka marrë përgjigje.
Britney Spears u takua me Sam Asghari në xhirimet e videoklipit të saj super seksi “Slumber Party”, i cili u shfaq në nëntor 2016.
Ata e kurorëzuan dashurinë e tyre në martesë në vitin 2022 pas gati gjashtë vitesh lidhje, në një ceremoni të mbushur me yje. Në atë kohë, një burim i tha “E! News” se këngëtarja e “Gimme More” ishte “shumë e emocionuar gjatë ceremonisë”, duke vënë në dukje se Sam “po i fshinte lotët me dashuri”./Living/