Aktori spanjoll Gabriel Guevara, ylli i filmit hit të Amazon Prime Video “Culpa Mia”, u arrestua në Festivalin e Filmit në Venecia. Guevara kishte një urdhër ndërkombëtar aktiv kundër tij për një sulm seksual në Francë. Policia e Venecias konfirmoi arrestimin, i cili u raportua fillimisht nga gazeta e Venecias La Nuova.
Gjykata e Apelit do të vendosë për çështjen e tij përpara se të fillojë procesi i ekstradimit. Për momentin nuk janë dhënë detaje të tjera rreth sulmit apo arrestimit. Guevara u arrestua nga policia e shtetit italian në Venecia të shtunën më 2 shtator, një ditë para se të merrte çmimin e aktorit të ri më të mirë nga Filming Italy të dielën më 3 shtator.
Me të dëgjuar për arrestimin e tij, Filming Italy anuloi çmimin, për të cilin ata thanë se ishte një “masë paraprake” në pritje të përfundimit të çështjes kundër tij. Festivali lëshoi një deklaratë në llogarinë e tij zyrtare në Twitter, duke shkruar se do të donte të sqaronte se prania në Venecia e aktorit spanjoll Gabriel Guevara, për të cilin disa faqe shtypi kohët e fundit raportuan se ishte në paraburgim, nuk lidhet me asnjë aktivitet apo prodhim të Festivalit të 80-të Ndërkombëtar të Filmit në Venecia.
Guevara fitoi famë në vitin 2018 si Cristian Mirales Haro në sezonin e parë të “Skam Spain”, një serial dramatik i suksesshëm për adoleshencë, dhe roli i tij kryesor në “Culpa Mia” vetëm sa e rriti popullaritetin e tij. /Living/