Gigi Riva, ish-sulmuesi i njohur italian, u nda nga jeta sot në moshën 79-vjeçare në Cagliari, qytetin ku ai u bë një nga emrat më të njohur të futbollit botëror.
Riva kishte ndjerë probleme shëndetësore në shtëpi dhe ishte dërguar me urgjencë në spital, ku situata e tij ishte normalizuar, siç kishte bërë të ditur edhe një raport mjekësor i publikuar gjatë pasdites.
Por gjatë darkës së sotme, situata e tij është përkeqësuar dhe është dhënë lajmi tragjik për ndarjen e tij nga jeta.
Riva ka qenë një nga emrat më të njohur të futbollit italian, duke fituar titullin kampion me Cagliari në sezonin 1969-1970, i vetmi në historinë e këtij klubi.
Ai ishte president nderi i Cagliarit, në klubin ku kaloi thuajse të gjithë karrierën e tij, duke luajtur 376 ndeshje e shënuar 207 gola.
Ndërkohë me Italinë ai fitoi Kampionatin Evropian të vitit 1968 dhe mori pjesë në finalen e Kupës së Botës 1970, duke shënuar gjithashtu në Itali-Gjermani 4-3.
Ai luajti 42 ndeshje për “Azurrët”, duke shënuar 35 gola, teksa edhe sot e kësaj dite mbetet golashënuesi më i mirë i të gjitha kohëve i kombëtares italiane të futbollit.