Arbër Hoxha vijon të kalojë një formë fantastike në kampionatin kroat, duke treguar vlerat çdo javë. Edhe këtë të shtunë Arbër Hoxha ka shënuar sërish, duke i dhënë tre pikët Dinamos së Zagrebit, e cila fitoi 2-1.
Jo vetëm ka realizuar golin e fitores, por ka shënuar një nga golat më të bukur, nga një kënd ku është thuajse e pamundur për të çuar topin në rrjetë.
I aktivizuar mes titullarëve, Hoxha pa skuadrën e tij të kalonte në avantazh e më pas të arrihej nga miqtë falë golit të ish-mesfushorit të Tiranës, Merveill. Por në minutën e 84-t, Hoxha tregoi aftësitë e tij me një gol të pabesueshëm.
Ai mori topin në krahun e majtë dhe pastaj nga një kënd i pamundur, lëshoi një goditje të kalibruar që shkoi mbi portierin dhe përfundoi në rrjetë, për t’i dhënë përsëri avantazhin ekipit të Dinamos së Zagrebit.
Ky ishte goli i tij i tretë këtë sezon në Kroaci.