Kampionia e Europës në Atletikë Luiza Gega u prit sot në një ceremoni të organizuar enkas në Bulevardin “Dëshmorët e Kombit” mes entuziazmit dhe duartrokitjeve të qytetarëve sportdashës dhe jo vetëm, me të cilët ajo ndau triumfin e një fitoreje të merituar denjësisht.
Luiza, e cila është njëkohësisht kampionia e parë europiane e atletikës me fanellën kuq e zi, u nderua nga Kryeministri Edi Rama me Kordonin e madh me Yll të Mirënjohjes Publike, në ceremoninë që vijoi në Sallën e Hartave, në Kryeministri.
Teksa i dorëzoi Medaljen e nderit, Kryeministri Rama tha se me fitoren e saj të merituar Luiza i ka dhënë sportit dhe Shqipërisë, letra të reja fisnikërie, si dhe imazhin e një Shqipërie që ja del me kokën lart mes gjithë të tjerëve.
Luiza Gega u shpall kampione e Europës në garën e 3000 metrave me pengesa në kampionatin Europian të Atletikës në Mynih, Gjermani.