Ndeshje vendimtare për kualifikim/ Sot, 4 përballje: Ekuador – Senegal, Hollandë – Katar, Iran – Shba dhe Uells – Angli

Sot do të luhen ndeshjet e fundit të grupit A dhe B, ku do të vendoset se kush do të kalojë në raundin e 16-shes.

Në orën 16.00 Ekuadori përballet me Senegalin dhe Holanda me Katarin.

Një barazim do të mjaftojë që Ekuadori  të hyjë në top gjashtëmbëdhjetëshe, ndërsa Senegali duhet të luftojë për të rrëmbyer  3 pikët, pasi humbja e çon ne eliminim të sigurt.

Nëse ndeshja do të përfundojë në barazim atëherë duhet që përballja mes  Holandës dhe Katar të fitohet nga arabët me diferencë golash. Këta të fundit janë mjaft të vetëdijshëm se aventura e tyre tashmë ka përfunduar, pavarësisht rezultatit. Për tulipanët duhet të paktën një pikë për të qenë të sigurt në 1/16.

Momentalisht Holanda është në krye të grupit me 4 pikë së bashku me Ekuadorin, ndërsa Senegali me 3 pikë, dhe Katari me 0.

Në mbrëmje në orën 20.00 do të zhvillohen ndeshjet e grupit B.

Irani dhe Shtetet e Bashkuara të Amerikës do të luajnë gjithçka në ndeshjen vendimtare.

Iranit i mjafton vetëm një barazim për të kaluar. Ata kanë pësuar një humbje drastike me Anglinë 6 me 2, por e rikuperuan atë me Uellsin që e mposhtën  2 me 0, duke marrë 3 pikët e para.

Amerika është e detyruar , të fitojë për të realizuar ëndrrën e saj për në 16-she. SHBA momentalisht kanë vetëm 2 pikë dhe renditen në vendin e 3.

Gjithçka  mbetet ende e hapur në grupin B, ku Uellsi dhe Anglia do të luajnë një Derbi me qëllim për të kaluar në 1/16 dhe gjithashtu vendin e parë.

Uellsianët, pas barazimit të marrë në debutimin e tyre ndaj SHBA-së, pësuan një disfatë të bujshme ndaj Iranit 2-0 që i ndërlikoi shumë planet. Të dyja skuadrat do të luftojnë për fitore dhe nuk do të tolerojnë gabimet, përveç fitores me diferencë të madhe.

Anglezët  janë favoritët kryesor në këtë grup. Ata mund të llogariten si të kualifikuar për shkak të golavarazhit.