Benny Thomas, një nga ekzekutivët e Facebook, i tha një reporteri nga Project Veritas se kompania e tij është po aq e fuqishme sa një shtet dhe duhet të prishet. “Asnjë mbret në histori” nuk është aq i fuqishëm sa Mark Zuckerberg, pretendoi ai.
“Asnjë mbret në historinë e botës nuk ka qenë sundimtari i dy miliardë njerëzve, por Mark Zuckerberg është.” – i tha Thomas një reporteri të Project Veritas, në një intervistë të botuar nga themeluesi i Project Veritas, James O’Keefe.
Thomas pohoi se Facebook “po bën shumë dëm në botë”, duke përmendur përpjekjet e CEO Mark Zuckerberg përtej rrjeteve sociale dhe në kujdesin shëndetësor dhe madje redaktimin e gjeneve.
“Qeveria duhet të ndërhyjë dhe të shkatërrojë Google dhe Facebook.” – tha ai, duke shtuar se kjo do ishte gjë e mirë për botën.
Thomas nuk është personi i parë që kërkon rregullim më të madh të qeverisë për gjigantët e teknologjisë në Silicon Valley.
Republikanët kanë akuzuar prej kohësh këto kompani për diskriminim ndaj konservatorëve dhe ish-presidenti Trump në mënyrë të përsëritur bëri thirrje që Kongresi të shfuqizojë Seksionin 230 të Aktit të Ndikimit të Komunikimit, i cili u jep platformave të mediave sociale imunitet nga paditja për përmbajtjen e postuar në faqet e tyre dhe u lejon atyre të vendosin se çfarë përmbajtje të vënë apo heqin nga faqet e tyre sipas dëshirës.
Thomas gjithashtu deklaroi se duke mbledhur kaq shumë të dhëna për përdoruesit e saj, Facebook mund t’i profilizojë ato me lehtësi. Ai i tha reporterit të Project Veritas se ai mund të identifikojë “njerëzit racistë” nga të dhënat e tyre.