Ministrja e Jashtme gjermane, Annalena Baerbock ka bërë thirrje që Suedia dhe Finlanda t’i bashkoheshin zyrtarisht aleancës së NATO-s këtë verë, pavarësisht refuzimit të vazhdueshëm të Turqisë për të ratifikuar kërkesat e tyre.
Baerbock, e cila po viziton Suedinë, tha se të dy vendet kanë përmbushur të gjitha objektivat për të cilat është rënë dakord gjatë samitit të NATO-s verën e kaluar, në Madrid.
Ajo e quajti të rëndësishme për të gjithë aleancën e NATO-s që të dy vendet të lejohen të anëtarësohen përpara samitit të ardhshëm të NATO-s, në korrik, në kryeqytetin lituanez Vilnius.
Baerbock tha se ajo pret që Turqia dhe Hungaria, dy vendet e vetme të NATO-s që nuk kanë miratuar ende kërkesat e Suedisë dhe Finlandës për t’u bashkuar me aleancën, ta bëjnë këtë pa vonesa të mëtejshme.
Ministrja gjermane bëri deklarata të ngjashme një ditë më parë, gjatë një vizite në Helsinki.
Baerbock vuri në dukje se Turqia ka rënë dakord për një memorandum tripalësh me Suedinë dhe Finlandën në takimin e Madridit të vitit 2022, që synon, ndër të tjera, adresimin e shqetësimeve të Turqisë rreth terrorizmit.
Në atë kohë, mosmarrëveshja dukej e zgjidhur dhe rruga për t’u bashkuar me NATO-n dukej e sigurt për Suedinë dhe Finlandën.
Por, Turqia ka vazhduar të bllokojë pranimin e evropianëve veriorë në aleancë.
Vendet që kërkojnë të anëtarësohen në NATO duhet të marrin miratimin nga të 30 anëtarët aktualë.