Zyrtari i lartë i Departamentit Amerikan të Shtetit, Antony Blinken iu ka bërë thirrje autoriteteve ruse që të lirojnë gaztarin e arrestuar për spiunazh, Evan Gershkovich.
“Sekretari Blinken përcolli shqetësimin e madh të Shteteve të Bashkuara për ndalimin e papranueshëm nga Rusia të një gazetari qytetar amerikan,” tha përmes një deklarate Departamenti i Shtetit.”Blinken bëri thirrje për lirimin e tij të menjëhershëm,” shtohet në deklaratë.
Blinken i kërkoi gjithashtu Kremlinit të lirojë menjëherë Whelan, një ish-marinist për të cilin SHBA thotë se është arrestuar gabimisht.
Gershkovich, një reporter i Wall Street Journal me bazë në Rusi, u arrestua javën e kaluar me akuzën e spiunazhit. Kjo ishte hera e parë që një gazetar amerikan është arrestuar me akuza nga Moska për spiunazh që nga Lufta e Ftohtë.
Whelan po vuan një dënim me 16 vjet burg për të njëjtat akuza, të cilat ai i mohon me forcë.
Whelan është caktuar si i arrestuar gabimisht nga Departamenti i Shtetit dhe Gershkovich pritet të marrë të njëjtin emërim, megjithëse nuk e ka marrë ende të dielën në mëngjes.
Thirrja e së dielës ishte një nga ato pak herë që diplomati më i lartë amerikan ka folur me homologun e tij rus që nga fillimi i luftës në Ukrainë dhe të gjitha ato biseda kanë pasur në fokus shtetasit e arrestuar amerikanë.