Listës së nominimeve për çmimin Nobel për paqen këtë vit, i shtohet edhe lëvizja “Black Lives Matter” për ndikimin që pati në ngritjen e vetëdijes mbi racizmin në të gjithë botën. Kështu argumenton në arsyetimin e tij, deputeti norvegjez, Petter Eide edhe pse protestat u shoqëruan me skena të shëmtuara dhune dhe plaçkitje të bizneseve, sidomos pas vrasjes së Xhorxh Flojd, më 25 maj të vitit 2020.
61-vjeçari Eide, i cili më parë ka nominuar aktivistë të të drejtave të njeriut nga Rusia dhe Kina u shpreh se vlerëson faktin që lëvizja ka mundur të mobilizojë njerëz nga të gjitha grupet e shoqërisë.
PETTER EIDE
POLITIKAN NORVEGJEZ
“Ajo ka qenë një lëvizje e gjerë dhe e ndryshme nga të mëparshmet. Dhënia e çmimit për paqe, Black Lives Matter, si forca më e fortë globale kundër padrejtësisë racore, do të dërgojë një mesazh të fuqishëm se paqja themelohet mbi barazinë, solidaritetin dhe të drejtat e njeriut dhe se të gjitha vendet duhet t’i respektojnë ato parime themelore”.
Nga Portland në Minneapolis në Kenosha, Uashington DC dhe Nju York u regjistruan përplasje të dhunshme me autoritetet ndërsa grupe kriminelësh përfituan nga trazirat për të plaçkitur dyqanet dhe për të djegur bizneset e ndërtesat.
Black Lives Matter u themelua në vitin 2013, në përgjigje të shfajësimit të vrasësit të Trayvon Martin, George Zimmerman.
Vitin e kaluar u renditën 318 nominime dhe çmimi u fitua nga Programi Botëror i Ushqimit.