Një 37-vjeçar danez, është autori i sulmit me shigjeta që la të vrarë të paktën 5 persona e plagosi dy të tjerë, në qytetin norvegjez të Kongsberg. Lajmin e bëri të ditur policia, e cila sqaroi se kishte arrestuar të dyshuarin.
Për 34 minuta, agresori i armatosur me shigjeta me hark, shënjestroi qytetarë të rastësishëm në disa skena krimi; një supermarket; një zonë rezidenciale dhe një konvikt. Mes të plagosurve është edhe një polic, i cili ishte jashtë shërbimit në momentin e sulmit. Ende i paqartë motivi i ngjarjes, ndërsa policia nuk përjashton se mund të bëhet fjalë për terrorizëm.
“Fatkeqësisht mund të konfirmoj se 5 persona janë vrarë dhe dy të tjerë janë plagosur; mes të cilëve edhe një polic jashtë detyrës. Rreth orës 18 e 30 minuta policia mori një sërë telefonatash lidhur me një person që lëvizte në qendrën e Kongsberg, i armatosur me shigjeta me hark. Menjëherë më pas, policia mbërriti në vendin e ngjarjes dhe arrestoi të dyshuarin. Nuk e dimë ende nëse është një sulm terrorist, apo politik”, tha shefi i Policisë.
Sipas policisë, agresori i identifikuar si Rainer Winklarson mendohet të ketë vepruar i vetëm. Mediat ndërkombëtare shkruajnë se i dyshuari kishte njoftuar se donte të vriste njerëz, përmes një videoje të postuar në kanalin e tij në You Tube, ku siç thuhet, ka treguar edhe aftësitë e tij në hedhjen e shigjetave me hark. Në Norvegji, është ende e gjallë frika për sulme të ekstremit të djathtë.
10 vite më parë, Anders Behring Breivik, vrau 77 vetë gjatë një tubimi të të rinjve laburistë në ishullin e Utojës, dhe një sulmi tjetër në Oslo.