Presidenti ukrainas Volodymyr Zelensky falënderoi sot Senatin Amerikan pas miratimit me shumicë dërrmuese 61 miliardë dollarë ndihmë ushtarake dhe ekonomike amerikane për vendin e tij. Në të njëjtën kohë, Joe Biden thekson se do të ishte mirë që armët dhe municionet të arrijnë te ukrainasit këtë javë.
“Falënderoj udhëheqësin e shumicës Chuck Schumer dhe udhëheqësin republikan të Dhomës së Përfaqësuesve Mitch McConnell për udhëheqjen e tyre të fortë në avancimin e këtij legjislacioni dypartiak, si dhe të gjithë senatorët amerikanë të të dyja partive që votuan për të”, tha zoti Zelensky në faqet e rrjeteve sociale.
SHBA ka qenë mbështetësi kryesor ushtarak i Ukrainës që nga shpërthimi i luftës në 2022 kur Rusia pushtoi territorin ukrainas, por paketa e re e ndihmës, e cila përfshin pajisje thelbësore, ishte bllokuar në Kongres prej muajsh.
“Unë vlerësoj gjithashtu mbështetjen e Presidentit (SHBA Joe) Biden dhe shpresoj se projektligji do të nënshkruhet së shpejti dhe se programi i ardhshëm i ndihmës do të jetë në përputhje me vendosmërinë që shoh gjithmonë në negociatat tona”, shtoi Zelensky.
Ushtria ukrainase po përballet me mungesë serioze si armatimi dhe kryesisht municioni, ashtu edhe personeli, ndërkohë që ushtria e Moskës po ushtron presion të pandalshëm në frontin lindor, ku tashmë ka marrë iniciativën e lëvizjeve. /vizionplus.tv