Polemika jo vetëm për Presidenten e Komisionit Evropian, Ursula von der Leyen, por edhe për kryeministrin britanik, Boris Johnson, për abuzimin e dyshuar të një mjeti motorik ndotës siç është avioni për misione dhe udhëtime të ndryshme, pavarësisht angazhimeve, i shpallur ditët e fundit përpara botës në konferencën e OKB-së kundër ndryshimeve klimatike të CoP26 në Gllazgou.
Nëse von der Leyen ishte në shënjestër nga “Daily Telegraph”, një gazetë pro-konservatore londineze, i cili zbuloi përdorimin e vazhdueshëm të avionëve privatë nga numri një i ekzekutivit të komunitetit të Brukselit, edhe për udhëtime prej disa dhjetëra kilometrash, edhe Johnson ka përfunduar po ashtu në akuzë nga gazeta “Daily Mirror”: tabloidi pro-Laburistëve, sipas të cilit, kryeministri u kthye në Londër të martën në mbrëmje nga Gllazgou me nxitim, gjithashtu me një fluturim privat.
Sipas gazetës, e ka bërë këtë për të marrë pjesë në një darkë joinstitucionale, ku ishte i ftuar në një klub me ish-kolegë gazetarë.
Një zgjedhje që ministri britanik për Aktivitetet Prodhuese, Kwasi Kwarteng, i pranishëm në COP26 për të diskutuar dekarbonizimin, e mbrojti shumë, po aq sa “Downing Street” kishte kthyer ditët e fundit një përgjigje ndaj polemikave të mëparshme të ngjashme për fluturimet e “BoJo”, duke nënvizuar se si Skocia është shumë larg dhe se kryeministri, duke pasur parasysh angazhimet e tij të shumta, si rregull, duhet të lëvizë sa më shpejt.
Prandaj Kwarteng, siguroi se kjo nuk ndryshon asnjë pikë të seriozitetit të angazhimeve të qeverisë drejt objektivit të emetimeve zero, të demonstruara nga “suksesi” i një serie të tërë hapash të ndërmjetëm të zbatuar tashmë në Mbretërinë e Bashkuar. Opozita laburiste, nga ana tjetër, e ka akuzuar Johnson për “hipokrizi”.
Presidentja e Komisionit Evropian, Ursula von der Leyen, u kritikua për përdorimin e një avioni privat për një fluturim 19-minutësh nga kryeqyteti austriak Vjena, në kryeqytetin sllovak të Bratislavës.
Ndërkohë, kompania “Gulf Stream”, i themeluesit të ‘Amazon’ Jeff Bezos, drejtoi një paradë prej 400 avionësh privatë të nisur për në Cop26 në Gllazgou.
Këtu përfshihen ato të Princit Albert të Monakos, të dhjetëra anëtarëve të familjes mbretërore dhe dhjetëra CEO-ve të “gjelbër”, të cilët kanë krijuar një bllokim të jashtëzakonshëm trafiku ajror.
Të paktën 52 avionë privatë u ulën në Gllazgou të dielën. Flota e avionëve privatë që mbërrinin për COP26, gjeneruan 13,000 tonë emetime CO2, ekuivalente me sasinë e prodhuar nga më shumë se 1,600 avionë britanikë në një vit.
Vetëm presidenti amerikan Biden, prodhoi rreth 100 tonë karbon për të qenë i pranishëm në konferencë, falë një flote prej katër avionësh, helikopterit “Marine One” dhe një parade të madhe makinash, duke përfshirë automjetin e tij të quajtur “The Beast” dhe SUV-e të shumta shoqëruese.
Avionë të tjerë privatë kanë zbritur në Skoci nga destinacione të ndryshme, duke përfshirë Stokholmin, Romën, Londrën dhe Brukselin, të gjithë të shërbyer nga rrugë të rregullta tregtare.
Shumica e avionëve ishin me qira, duke e bërë të vështirë të dihej se kush ishte në bord. Trafiku i madh ajror detyroi disa avionë, pasi zbarkuan VIP-at në aeroportin e Gllazgout, duke fluturuar 30 milje në Prestwick që ndodhet aty pranë, për shkak të mungesës së parkimit.