Aksident me 7 të plagosur mes të cilëve 2 fëmijë të moshës 5 dhe 14 vjeç.
Ngjarja ka ndodhur në aksin rrugor Maliq-Pogradec në afërsi të kryqëzimit të fshatit Gurishte. Burime të siguruara thanë se njëri nga mjetet e përfshirë në aksidentin e 3 fishtë ka qenë duke lëvizur nga Maliqi në drejtim të Pogradecit, ndërkohë që dy mjetet e tjera po shkonin drejt Korçës.
Krejt papritmas mjeti që vinte nga Maliqi ka kryer një manovër të gabuar duke kaluar nga krahu i djathtë i rrugës në krahun e kundërt. Aty ku më pas është përplasur fillimisht me një mjet golf e më pas edhe me një mjet tjetër. Si rezultat i këtij aksidenti 7 persona mes të cilëve 3 drejtues të mjeteve kanë mbetur të plagosur. Për transportimin e tyre drejt spitalit të Korçës janë angazhuar 2 ambulanca të Korçës dhe 1 e Maliqit.
Burime pranë spitalit bëjnë me dije se të 7 të plagosurit përfshi edhe minorenët janë jashtë rrezikut për jetën. Ekspertët e policisë rrugore po hetojnë për shkaqet e këtij aksidenti, por mendohet që drejtuesi i mjetit që solli përplasjen të ketë qenë duke udhëtuar me shpejtësi në kushte të vështira atmosferike dhe rreshje të dendura shiu.