Pesë personat e arrestuar për aferën me inceneratorin e Fierit ndodhen sot në gjykatën e posacme për rivlerësiminh e masës së sigurisë. Ndërsa 6 të tjerë të cilët akuzohen nga Spak pëer të njëjtën cështje, ndodhen ende në kërkim.
Mes të arrestuarve është biznesmeni Arben Dervishaj, i cili sipas prokurorisë, ishte mbikëqyrësi i punimeve të inceneratorit. Ai dyshohet se ka miratuar dhe dorëzuar raporte për punë të pakryera. Sipas SPAK, Dervishaj besohet se ka marrë shuma parash nga Klodian Zoto, si dhe përfitime të tjera si udhëtime me avion, qëndrime në hotele si dhe bileta ndeshjesh në Europë.
Në pranga ndodhen edhe Regan Merdani, Robert Shabani, Gentian Zifla dhe Enver Sheshi. Ndërsa në kërkim janë Arber Denizi, Juri Ymeraj, Silvester Dreza, Arjola Kodra, Luran Dusha dhe Xhuzepe Çiafalione.
SPAK ka siguruar prova se të akuzuarit kanë pasqyruar shërbime në inceneratorin e Fierit me vlerë 4 milionë euro, punë që në fakt nuk janë kryer asnjëherë. Këto para janë marrë nga shoqëria koncesionare me pronar Klodian Zoton.
Shoqëria e tij ka realizuar blerje fiktive nga kompanitë e personave të tjerë me një vlerë totale afro 360 milionë lekë dhe me një dëm të shkaktuar shtetit përmes TVSH-së prej 60 milionë lekësh.
Për aferën me inceneratorin e Fierit janë nën akuzë edhe ish-deputeti i PS-së Alqi Bllako si dhe ish-ministri i mjedisit Lefter Koka.