Policia e Tiranës ka shtuar operacionet në fushën e narkotikëve, kjo e dëshmuar edhe në rezultatet e deritanishme ku janë goditur disa grupe kriminale, që furnizonin kryeqytetit me drogë.
Në bilancin e 4 muajve të parë të këtij viti, rezulton se antidroga e Tiranës ka arritur që të sekuestrojë afro 5.5 kg kokainë, 47 kg heroinë dhe 137 kg kanabis.
Nga ana tjetër, për gjatë vitit të kaluar, blutë kanë arritur të sekuestrojnë 9 kilogramë kokainë, 670 gramë heroinë dhe 90 kg kanabis. Nga krahasimi i shifrave shihet se vetëm 4 muaj trafikimi i heroinës ka pësuar një goditje të madhe, gjithashtu edhe kanabisi. Në muajin mars u shënuan goditjet më të forta ndaj narkotikëve, ku u sekuestruan 42 kilogramë heroinë, 2.6 kg kokainë dhe 62 kg kanabis.
Në këto 4 muaj, rezultojnë si autorë të përfshirë në fushën e narkotikëve 582 persona. Në mesin e tyre janë krerët e grupeve të goditura, furnizuesit e drogave, por edhe shpërndarësit. Prej tyre janë të arrestuar 124 persona e ndërsa 458 të tjerë po hetohen në gjendje të lirë.
Burime shprehen, se në rezultatin e këtyre goditjeve ka ndikuar edhe bashkëpunimi me Prokurorinë e Tiranës, organ i cili ka lejuar edhe realizimin e përgjimeve ku është bërë e mundur dokumentimi, por edhe identifikimi i personave të përfshirë në shitjen dhe trafikun e narkotikëve.
Por nuk kanë munguar as agjentët e infiltruar, të cilët kanë arritur që të depërtojnë në brendësi të grupeve kriminale dhe më pas është realizuar goditja e tyre. Kryesisht grupet kriminale kryenin aktivitetin në zonat e populluara të Tiranës si në ish-Bllok, në afërsi të ish-Parkut, por nuk ka munguar as shpërndarja edhe në afërsi të shkollave të mesme.