Joshko Çervenkovski, shtetas maqedonas, një nga personat që dyshohet si i përfshirë në vrasjen e biznesmenit Vajdin Lame në 2005, është paraqitur në ambientet e Prokurorisë së Posaçme.
Kjo është dita e dytë që ai pyetet nga prokurororët e posaçëm, pas dëshmisë së Luftar Reçit në dëshminë e dhënë prej tij në 2020, vit kur mori edhe statusin e bashkëpunëtorit të drejtësisë. Asokohe, Reçi nxorri emrin e Joshko Çervenkovsit në rrëfimin e tij.
“Në shkurt të 2005, besoj nga mesi i muajit, më ka telefonuar Lul Berisha. Ai ma tha; më gjej dhe mua nga ato ‘nëntat’ (kallëpë tritoli). Bëhej fjalë për një atentat të përgatitur nga unë për hasmin tim në Dibër, atentat i parealizuar pasi ai mbante me vete fëmijët e tij dhe nuk e lejova shpërthimin sepse nuk doja që të vrasja fëmijë. Luli ishte në dijeni të kësaj ngjarje, pasi i kisha treguar vetë dhe kishte mësuar nga unë se J… kishte përgatitur minat për ngjarjen. Për këtë arsye më kërkoi dhe një minë për vete.”