Përfundon edhe procesi i numërimit te votës së kandidatëve për deputetë, në dy qarqet e fundit, në Tiranë dhe Durrës. Numërimi i kutive të mbetura siç edhe ishte parashikuar nuk do të prodhonte asnjë rezultat surprizë përveç se do të thellonte numrin e votave të grumbulluara nga Fatmir Xhafaj dhe Ornaldo Rakipi që morën më shumë se 10 mijë vota duke siguruar mandatin e deputetit. Ish Ministri i Brendshëm Fatmir Xhafaj i renditur i 23 në listën e Tiranës jo vetëm theu herësin por arriti të marrë votën e 16 mijë e 738 zgjedhësve të qarkut të Tiranës.
Surpriza e të njëjtit qark ishte i 30 në listën e Tiranës, Ornaldo Rakipi, që përveç se djali i ish deputetit të PDIU-së. Aqif Rakipi, emri i tij ishte i panjohur deri në çastin që arriti të grumbullojë 15 967 vota, tanimë me mandat deputeti. Vota preferenciale për Ornaldo Rakipi është shumëfish më e lartë se për politikanë të karrierës si Ministri i Diasporës Pandeli Majko dhe ish Ministres së Mbrojtjes Mimi Kodheli që humbën mandatin e deputetit.
Me mbylljen e numërimit të votave, renditja e deputetëve për secilin qark si për Partinë Socialiste dhe koalicioni “Aleanca për Ndryshim” udhëhequr nga Partia Demokratike do të rikonfigurohet.
Po aq ndryshim do të pësojë veçanërisht, lista e deputetëve në qarkun e Durrësit apo të Vlorës për Partinë Socialiste. Do të duhet të presim nëse kryeministri Edi Rama, më i votuari në të dyja qarqet cilin mandat të deputetit do të mbajë. Nëse zgjedh Durrësin deputetja e ardhshme e Vlorës do të jetë Teuta Ramaj dhe në të kundërt në Durrës do të jetë Ana Dhamo.
Ende nuk ka një vendimarrje as nga kryetarja e Lëvizjes Socialiste për Integrim, Monika Kryemadhi, nëse vendin në Tiranë do t’ia lë Petrit Vasilit dhe në Fier, Kejdi Mehmetaj.
Përfundimi i procesit të numërimit të votës preferenciale rendit të parin si më shumë të votuarin nga socialistë, Taulant Ballën më 21 604 vota, ndërsa nga demokratët Lulzim Basha, më 16 186.