Policia e Shtetit ka reaguar lidhur me videon e rëndë ku dhunohet një nxënëse e shkollës “Kongresi i Manastirit”. Në njoftim zyrtar sqarohet se është bërë i mundur identifikimi i nxënësve të pranishëm në video.
“Pas verifikimive të kryera për identifikimin e tyre, në bashkëpunim edhe me drejtorinë e shkollës, u bë i mundur identifikimi i një të mituri që kishte filmuar konfliktin, si dhe identifikimi i 4 të miturave të përfshira në konflikt”, thuhet në njoftim.
Policia njofton se të miturit e përfshirë po merren në pyetje në në prani të prindërve dhe punonjësve social.
“Në ambientet e Komisariatit të Policisë Nr. 6, në prezencë të prindërve dhe të punonjësve socialë, janë shoqëruar dhe po intervistohen 5 të mitur të moshave 13 dhe 14 vjeç (një djalë e 4 vajza)”, vijon njoftimi.
Uniformat blu bëjnë me dije se hetimet lidhur me rastin po vijojnë. Nga ana tjetër drejtuesit e shkollës “Kongresi i Manastirit” kanë deklaruar se ngjarja e rëndë është regjistruar në ambiente jashtë shkollës. Në reagim thuhet se institucionet dhe prindërit nuk ishin vënë në dijeni të rastit.