“Nuk kam dhunuar familjen, por e mbaja të izoluar për shkak të besimit tim fetar’. Kjo ishte dëshmia e 50-vjeçarit Xherxh Laçi, i cili u arrestuar mesditën e së dielën nga Komisariati nr.4 në Tiranë për shkak se mbante të ngujuar prej 6 vitesh bashkëshorten dhe dy fëmijët e mitur.
Në dëshminë e tij, Laçi është shprehur se nuk lejonte që fëmijët të shkonin në shkollë që t’i mbronte nga rruga e keqe dhe të mos infektoheshin nga shoqëria.
Por nga ana tjetër, bashkëshortja e tij dhe dy djemtë e mitur, 15 dhe 17 vjeç kanë rrëfyer përpara policisë në prani të psikologëve se janë dhunuar sistematikisht nga kryefamiljari.
Xherxh Laçi jetonte në kushte të vështira ekonomike në zonën e 5 Majit në Tiranë. Ai ishte papunë dhe mbijetonte nga ndihmat që u jepeshin herë pas here.
Babai dhe e motra e 50-vjeçarit kanë mohuar që Xherxh Laçi të ketë ushtruar dhunë ndaj tyre. Sipas babait të tij, i biri ishte besimtar mysliman që falej, por nga ana tjetër kishte probleme të shëndetit mendor.
Për shkak të sjelljeve të tij ekstremiste si dhe municioneve që u gjetën në banesën, në hetime është përfshirë edhe Antiterrori.
Xherxh Laçi akuzohet për dhunë në familje, keqtrajtim të miturish dhe armëmbajtje pa leje. Ndërkohë familja e tij tashmë është marrë nga qendra sociale ku po i nënshtrohet rehabilitimit.
Xherxh Laçi është një emër i njohur për policinë pasi përpara 9 vitesh u arrestua, pasi qëlloi me armë zjarri duke terrorizuar banorët e lagjes.