Gledis Gjipali ka komentuar mbajtjen e protestës së opozitës në 6 dhjetor, ditën kur në vendin tonë do zhvillohet samiti BE-Ballkani Perëndimor.
Për Vizion Plus, Gjipali tha se në rast se opozita bën tubim të qetë dhe pa u përplasur me forcat e policisë, nuk cënohet siguria e vendit.
“Nuk është gjë e jashtëzakonshme mbajtja e protestave. Ndërsa sa i takon cënimit të sigurisë, varen nga dinamikat e protestës. Nëse do mbëhet në rregullat e sigurisë atëhere do të kalojë si diçka normale. Nëse do ushtrohet presion ndaj strukturave që mbajnë sigurinë atëhere nuk do të jetë diçka e mirë dhe do dëmtojë imazhin e vendit”, tha Gjipali.
Ndërsa referuar mungesës së Vuçiç në Samit, Gjipali tha se presidenti serb gjen pretekste për të shmangur përballjen me BE dhe kritikat që i vijnë nga Unioni.
“Serbia është e kushtëzuar nga politikat që Vuçiç ka ndjekur dhe duke u gjetur në vështirësi nga presioni i vazhdueshëm nga BE për politikën e tij, sidomos ndaj Rusisë ka bërë që ai të mos vijë dhe të shmang presionin e radhës. Mendoj është një pretekst lidhja me Kosovën dhe tonet e ashpra janë të pajustifikuara në situatën që Serbia ka me Kosovën. Mendoj se është shmangia e presionit të drejtpërdrejtë që BE po i bën Serbisë për të mos vazhduar të ndjek lojën me dy porta dhe të fitojë nga të dyja anët”, tha Gjipali.