Rikthehen edhe një herë tjetër reshjet e borës në qarkun e Korçës.
Reshje që kanë shkaktuar probleme të shumta përsa i përket furnizmit me energji elektrike. Burime zyrtare bëjnë me dije se pa energji elektrike janë fshatrat të njësisve administrative Trebinjë, Velçan, Dardhas, Lekas, Moglicë. Pa energji elektrike janë edhe 5 fshatra të Njësisë administrative Gorë e 6 fshatra të njësisë Libonik. Probleme me energjinë elektrike kanë pasur edhe fshatrat e njësisë administrative Vithkuq.
Ndërkohë që nuk raportohen probleme sa i përket furnizimit me energji elektrike të fshatrave të bashkisë së Devollit përfshi dhe qytetin e Bilishtit si dhe fshatrat e bashkisë së Pustecit. Reshjet e borës të orëve të fundit kanë shkuar nga 20 cm në qytetin e Bilishtit e deri në 90 cm në fshatin Shtyllë. Kjo ka sjellë fshatra të shumtë të izoluar kryesisht në njësitë administrative malore Vithkuq e Lekas në bashkinë e Korccës, Dardhas, Trebinjë, Velçan në bashkinë Pogradec si dhe fshatrat e Devollit të sipërm në bashkinë Devoll.
Grupe të OSHEE ndodhen në terren duke punuar për të rikthyer energjinë elektrike ndërkohëqë Ndërmarjet e shërbimeve Publike të bashkive të qarkut janë duke punuar për të normalizuar situatën në rrugët e fshatrave.