*Koalicioni VLEN në Strugë njofton opinionin publik se nuk do të ndërpritet asnjë kontratë pune e punonjësve shëndetësorë në Strugë.
Situata e krijuar gjatë ditëve të fundit erdhi si pasojë e një ngërçi institucional, i cili u shkaktua pas dorëheqjes së ministrit të Shëndetësisë.
Lajmi i mirë është se ky ngërç është tejkaluar dhe tashmë është dhënë urdhër nga autoritetet përkatëse që kontratat e punës të vazhdojnë. Drejtori i Spitalit të Përgjithshëm në Strugë është i udhëzuar të zbatojë këtë vendim, duke garantuar vazhdimësinë e angazhimit të stafit mjekësor shqiptar.
Asnjë punonjës nuk do të mbetet pa punë. E kuptojmë dhe ndajmë shqetësimin e mjekëve, infermierëve dhe gjithë personelit të angazhuar në këtë institucion shëndetësor.
Angazhimi ynë është që të krijojmë kushte për punësim të përhershëm, me paga dinjitoze dhe kushte pune të denja – duke lënë pas praktikën e deritanishme me kontrata të pasigurta dhe shpërblime qesharake, një trashëgimi e qeverisjes së mëparshme nga BDI.
Koalicioni VLEN mbetet i përkushtuar ndaj reformave të nevojshme për një sistem shëndetësor më të drejtë dhe më funksional.