Takim përkujtimor në Strugë: Jashar Pollozhani nderon figurën e Nënës Terezë
Në kuadër të Ditëve Përkujtimore të Nënës Terezë në Strugë, u zhvillua një ngjarje e veçantë kulturore dhe shpirtërore, ku u mirëprit Don Lush Gjergji, një nga biografët më të njohur të shenjtores shqiptare dhe njohës i thellë i jetës dhe veprës së saj. Me përkushtimin dhe devotshmërinë e tij shumëvjeçare, Don Lush Gjergji ka ndriçuar ndër vite misionin humanitar të Nënës Terezë, duke e afruar më shumë me zemrat e njerëzve.
Ngjarja u pasurua me praninë e personaliteteve të shquara nga fusha të ndryshme, si: Dr. Skender Asani, Don Fatmir Koliqi, Emin Azemi, Bekim Adili dhe Besnik Rahmeti, të cilët së bashku përçuan mesazhin se vepra e Nënës Terezë mbetet një urë bashkimi përtej dallimeve etnike, fetare apo kulturore.
Me këtë rast, u promovuan edhe tri vepra të reja letrare dhe studimore të cilat i kushtohen jetës dhe misionit të Nënës Terezë, duke e thelluar më tej njohjen dhe nderimin ndaj trashëgimisë së saj të jashtëzakonshme.
Organizator dhe nikoqir i këtij takimi të rëndësishëm ishte Shoqata Humanitare Bamirëse “Nëna Terezë” me seli në Strugë. Kryetari i SHHB “Nëna Terezë”, z. Jashar Pollozhani, në fjalën e tij përshëndetëse theksoi rëndësinë e ruajtjes dhe promovimit të vlerave që përfaqësonte Nëna Terezë, si dashuria për njeriun, përkushtimi ndaj të varfërve dhe ndihma pa kushte.
Ky takim dëshmoi edhe një herë se misioni i Nënës Terezë vazhdon të jetojë mes nesh, duke na bashkuar të gjithëve në frymën e humanizmit dhe shpresës.
