Arabia Saudite do të investojë 20 miliardë dollarë (16.9 miliardë euro) në inteligjencën artificiale deri në vitin 2030, thanë autoritetet atje.
Ekonomia më e madhe e botës arabe nisi një strategji të inteligjencës artificiale në tetor për të tërhequr investitorë si pjesë e planit ambicioz të Vizionit 2030 të Princit të Kurorës Mohammed bin Salman për të lehtësuar varësinë e vendit nga nafta.
“Arabia Saudite do të investojë 20 miliardë dollarë deri në vitin 2030”, tha Abdulhah Al-Ghamdi, drejtor i Drejtorisë së të Dhënave dhe Inteligjencës Artificiale, themeluar në vitin 2019, raporton AFP.
Sipas tij, shteti dëshiron që inteligjenca artificiale të jetë një përbërës i ekonomisë alternative përmes ndërmarrjeve fillestare dhe inovative.
“Ne e shohim inteligjencën artificiale si një burim të kursimeve dhe të ardhurave shtesë”, shtoi Ghamdi përpara një samiti në internet të liderëve të G20.
Ashtu si shtetet e tjera të pasura me energji të Gjirit, Arabia Saudite është veçanërisht e përqendruar në teknologjitë për të diversifikuar ekonominë e saj të prekur nga çmimet e ulëta të naftës dhe epidemia e virusit koronar.