Presidentja e Kosovës, Vjosa Osmani, i ka kërkuar ministres së Jashtme, Donika Gërvalla, shpalljen non grata të dy zyrtarëve rusë në Kosovë. Në argumentimin e saj të publikuar në rrjetet sociale, Osmani thekson se zyrtarët e Zyrës Ndërlidhëse të Federatës Ruse në Kosovë kanë cenuar sigurinë kombëtare dhe rendin kushtetues të Kosovës. Ndërkohë MPJD-ja, ka nxjerrë vendimin për shpalljen e tyre persona të padëshirueshëm.
“Këtë javë kam kërkuar nga zëvendëskryeministrja, njëherësh ministre e Punëve të Jashtme dhe e Diasporës, Donika Gërvalla-Schëarz, t‘i shpallë persona non grata dy zyrtarë të Zyrës Ndërlidhëse të Federatës Ruse në Kosovë, për shkak të aktivitetit të tyre të dëmshëm, i cili ka cenuar sigurinë kombëtare dhe rendin kushtetues të Republikës së Kosovës. Sot, MPJD-ja ka nxjerrë vendimin për shpalljen e këtyre dy zyrtarëve rusë persona të padëshirueshëm dhe në të njëjtën kohën i ka njoftuar institucionet ligjzbatuese dhe autoritetet përkatëse për zbatimin e tij”.
Osmani nënvizon se institucionet e Kosovës janë të vendosura në luftën kundër ndikimit rus në rajon, që synon të minojnë arritjet e e përbashkëta me SHBA, NATO dhe BE.
“Institucionet e Republikës së Kosovës janë të vendosura në luftën kundër ndikimit malinj të Federatës Ruse dhe satelitëve të saj në rajon, të cilët synojnë rrënimin e arritjeve tona dhe të SHBA-së, NATO-s, dhe BE-së. Për këtë arsye, do të vazhdojmë të bashkëpunojmë ngushtë me aleatët tanë amerikanë dhe evropianë për ta parandaluar tentimin që Kosova dhe rajoni ynë të jenë pre e ambicieve destablizuese të Federatës Ruse.
I siguroj qytetarët e vendit se institucionet e Republikës së Kosovës nuk do të hezitojnë të veprojnë çdoherë kur cenohet siguria dhe rendi kushtetues në vend.
