Sekretari i Përgjithshëm i OKB-së Antonio Guterres është shprehur tepër i shqetësuar për një fatkeqësi të mundshme në stacionin më të madh bërthamor të Evropës në Zaporizhia të Ukrainës, pas bombardimeve në këtë central.
Rusia dhe Ukraina kanë akuzuar njëra-tjetrën për sulmet. Guterres nuk fajësoi asnjërën palë, por tha se po luhet me zjarrin.
ANTONIO GUTERRES
SEKRETARI I PERGJITHSHEM I OKB-së
Çdo sulm ndaj një centrali bërthamor është një vetëvrasje. Shpresoj që ato sulme të marrin fund dhe në të njëjtën kohë shpresoj që Agjencia Ndërkombëtare e Energjisë Atomike do të jetë në gjendje të hyjë në termocentral.
Guterres i bëri këto komente gjatë vizitës që zhvilloi në Japoni në Hiroshima, ku mbajti fjalim në 77-vjetorin e sulmit të parë me bombë bërthamore në botë. Edhe Agjencia Ndërkombëtare e Energjisë Atomike tha se ishte jashtëzakonisht e shqetësuar nga bombardimi i të premtes ndaj termocentralit bërthamor.
Sulmin e dënoi edhe presidenti Zelenski, i cili tha se Moska po përpiqet të përhapë terror nuklear dhe bëri thirrje për shtimin e sanksioneve.
Po pavarësisht luftimeve në lindje, nga portet e Ukrainës vijon transporti i grurit, dy anije të tjera me misër dhe sojë kanë dalë nga portet duke e çuar në dhjetë totalin e tyre që nga fillimi i zbatimit të marrëveshjes.
Anija Sakura, po transporton 11,000 ton sojë në Itali, ndërsa Arizona rreth 48,000 ton misër në Turqinë jugore.
