Ka “disa shenja” se Kina ka plane për të mbështetur Rusinë në pushtimin e Ukrainës.
Këtë e ka bërë të ditur sekretari i përgjithshëm i NATO-s, Jens Stoltenberg, i cili i bën thirrje Pekinit të “heqë dorë” nga planet e tij, të cilat, duke mbështetur një luftë të paligjshme, do të përbënin shkelje të së drejtës ndërkombëtare.
“Aleatët e NATO-s dhe SHBA-të e kanë paralajmëruar Kinen që të mos e bëjë këtë, kjo nuk duhet të ndodhë. Kina nuk duhet të mbështesë luftën e paligjshme të Rusisë,” tha Stoltenberg në një intervistë me AP.
Administrata e Presidentit të Shteteve të Bashkuara, Joe Biden, nderkohe, po vlerëson zbulimin e informacionit të inteligjencës në dispozicion të Uashingtonit, i cili sipas Shtëpisë së Bardhë do të demonstronte se si Kina po mendon furnizimin me armë për Rusinë.
Kjo është bërë e ditur nga zyrtarë anonimë të cituar nga gazeta “Wall Street Journal”.
