Sekretari i Përgjithshëm i OKB-së Antonio Guterres tha sot, përmes zëdhënësit të tij, se ai është “thellësisht i shqetësuar nga shkëmbimi i fundit i goditjeve ushtarake midis Iranit dhe Pakistanit ” në mes të tensioneve të përshkallëzuara në rajon.
Guterres “i kërkon të dy vendeve të tregojnë përmbajtje maksimale për të shmangur çdo përshkallëzim të mëtejshëm të tensioneve”, shtoi Stephane Dujarric në një deklaratë, duke u bërë thirrje të dy vendeve që të zgjidhin mosmarrëveshjet e tyre “përmes dialogut dhe bashkëpunimit”.
“Sekretari i Përgjithshëm nënvizon se të gjitha shqetësimet e sigurisë midis dy vendeve duhet të adresohen përmes mjeteve paqësore, përmes dialogut dhe bashkëpunimit, në përputhje me parimet e sovranitetit, integritetit territorial dhe marrëdhënieve të mira fqinjësore”, tha zëdhënësi.
Pakistani filloi bastisjet kundër militantëve separatistë brenda Iranit sot, në një sulm hakmarrës dy ditë pasi Teherani tha se kishte goditur bazat e një grupi tjetër brenda tokës pakistaneze./vizionplus.tv
