Gruaja dhe fëmijët e një drejtuesi bande ekuadoriane të shpallur në kërkim janë arrestuar dhe dëbuar nga Argjentina.
Ministri i Sigurisë së Argjentinës tha se masa kundër familjes së Adolfo Macías Villamar tregoi se vendi është një “territor armiqësor për narko-kriminelët”.
Kreu i bandës, i njohur si Fito, është i lirë pasi u arratis nga një burg ekuadorian në fillim të këtij muaji.
Ekuadori është nën një gjendje të jashtëzakonshme, ndërsa kërkimi mbarëkombëtar për bosin e krimit të organizuar vazhdon.
Autoritetet argjentinase publikuan të premten pamjet e shoqërimit të disa personave që ata thonë se kanë lidhje me Fiton.
Ministrja argjentinase e Sigurisë Patricia Bullrich tha në një konferencë për shtyp se ata u ndaluan në një pronë në rajonin e Kordobës dhe ishin kthyer në Ekuador.
Ajo tha se tetë persona u deportuan gjithsej, duke përfshirë bashkëpunëtorë dhe anëtarë të familjes.
Ministri i Brendshëm Guillermo Francos tha se Argjentina “nuk do të ishte një strofkë për kriminelët”.
Fito, i cili është kreu i bandës Los Choneros dhe është akuzuar për orkestrimin e dhunës së mëparshme në burg, u zhduk nga qelia e tij në një strukturë në qytetin e Guayaquil.
Ai ka qenë gjithashtu i lidhur me vrasjen e Fernando Villavicencio, një kandidat presidencial kundër korrupsionit, i cili u qëllua për vdekje gushtin e kaluar.
Pas arratisjes, presidenti i Ekuadorit Daniel Noboa i shpalli luftë bandave të vendit dhe vendosi kushte të ashpra sigurie, qëndrim i cili është pritur me nivele të paprecedentë dhune nga bandat e Ekuadorit.
Në fillim të kësaj jave, autoritetet thanë se kishin rifituar kontrollin e burgjeve të vendit pas ditësh trazirash, por i arratisuri më i kërkuar i vendit mbetet i pakapshëm./vizionplus.tv
