Këshilli organizativ i protestës kundër shtrenjtimit të energjisë elektrike në Maqedoni, ka dalë me një njoftim në lidhje me organizimin e protestave dhe kërkesat e tyre.
Nga këshilli thonë se protestat do të mbahen të enjten (6 gusht) në ora 19:00 në sheshin Iliria në Tetovë, njofton Telegrafi Maqedoni.
“Të nxitur nga reagime të shumta të qytetarëve pas rritjes së fundit të çmimit të energjisë elektrike për të mbuluar humbjet e prodhuesve por edhe nga reagimi i qytetarëve për shërbimet jokorrekte të kompanive energjetike ndaj tyre, dhe të motivuar për t’i gjetur dhe për t’i dhënë zgjidhje një problemi të vjetër e të paadresuar mjaftueshëm deri tani, dhe me qëllim për të parandaluar reagime dhe sjellje të dhunshme e radikale të grupeve të caktuara të qytetarëve të mllefosur, ne Këshilli Iniciator për organizimin e protestës kundër shtrenjtimit të energjisë elektrike si dhe ndaj shumë problemeve tjera të lidhura me energjetikën, ftojmë qytetarët e Tetovës me rrethinë, që ditën e Enjte, më 6 Gusht 2020, në ora 19:00, të na bashkohen në sheshin Iliria: për të kundërshtuar 1) vendimin e KRRE-së për rritjen e çmimit të energjisë elektrike; për të reaguar ndaj 2) monopolit të shërbimeve të kompanisë EVN dhe sjelljes jokorrekte të tyre ndaj konsumatorit; për të kërkuar 3) zhbërjen e KRRE-së, organ që i shërben interesit të grupeve të biznesit dhe korporatave duke dëmtuar ekonominë mjaft të rënduar të qytetarëve; për të kërkuar 4) krijimin e një trupi të pavarur arbitrar në shërbim të qytetarëve për të verifikuar cilësinë e shërbimeve energjetike”, (sic) thuhet në njoftim.
Ata më tej i ftojmë qytetarët që do marrin pjesë në këtë protestë të respektojnë rekomandimet dhe masat mbrojtëse ndaj pandemisë Covid-19 (mbajtje e maskave dhe respektim të distancës fizike).
Ata poashtu i ftojnë organizatat joqeveritare por dhe institucionet që të përkrahin dhe mbështesin organizimin e protestës./Telegrafi/
The post Të enjten në Tetovë protesta kundër shtrenjtimit të rrymës, Këshilli organizativ jep detaje appeared first on Telegrafi.
