Sipas të dhënave nga Enti Shtetëror i Statistikave të RMV-së, kostoja e jetesës në maj 2025 u rrit për 1.5% krahasuar me muajin prill.
Kjo rritje është shkaktuar kryesisht nga rritja e çmimit të ushqimit dhe pijeve joalkoolike, të cilat shënuan një rritje prej 4.1%.
Përveç ushqimit, rritje çmimesh u regjistrua edhe për mallra dhe shërbime të ndryshme (1.5%), pije alkoolike, duhan (0.8%), veshmbathje dhe këpucë (0.5%), si dhe për rekreacion, kulturë, mobilje dhe mirëmbajtje shtëpiake. Rritje më të vogla çmimesh u regjistruan edhe në kategoritë e strehimit, shëndetit dhe energjisë.
Nga ana tjetër, qytetarët ndjenë lehtësim në transport, ku çmimet ranë me 3.6%, dhe një rënie e lehtë u regjistrua edhe në shërbimet e hotelerisë (restorante dhe hotele) dhe komunikimet.
Krahasuar me të njëjtin muaj të vitit të kaluar, maji 2025 regjistroi inflacion prej 3.3%, që do të thotë se çmimet janë rritur mesatarisht me kaq gjatë një viti.
Indeksi i çmimeve me pakicë, nga ana tjetër, tregon një rritje prej 1.6% në bazë vjetore, ndërsa rritja mujore krahasuar me prillin është minimale – 0.2%. Edhe pse disa produkte dhe shërbime janë bërë më të lira, pamja e përgjithshme tregon se jeta vazhdon të bëhet më e shtrenjtë, veçanërisht kur bëhet fjalë për shpenzimet themelore siç është ushqimi./Telegrafi/
The post ESHS-Maqedoni: Kostoja e jetesës në maj 2025 u rrit për 1.5% appeared first on Telegrafi.