Në një kohë kur shumë sy kalojnë pa i parë, pastruesit e qytetit të Strugës vazhdojnë punën e tyre pa u ndalur, qoftë nën rrebeshin e shiut, në acarin e dimrit apo në të nxehtin përvëlues të verës. Ata janë punonjësit e Ndërmarrjes Publike “Komunale”, të cilët çdo ditë, herët në mëngjes apo vonë në mbrëmje, kujdesen që qyteti të jetë i pastër, i rregullt dhe i jetueshëm për të gjithë.
Me veshje të thjeshta pune dhe mjete, ata përballen me kushte të vështira atmosferike dhe sfida të përditshme në rrugët dhe lagjet e Strugës. Ndonëse shpesh të padukshëm për syrin e zakonshëm, puna e tyre është jetike për shëndetin dhe mirëqenien e komunitetit.
Qoftë kur termometri kalon 40 gradë celsius, apo kur bora mbulon rrugët dhe shiu rrëke ulet nga çatitë, ata janë aty. Një pasqyrë e përkushtimit dhe e përgjegjësisë që shpesh nuk vlerësohet sa duhet.
Drejtori Iqmet Islami, nga Komunalja e Strugës bën të ditur se stafi i pastrimit angazhohet me përkushtim të plotë, dhe pavarësisht sfidave, qëllimi mbetet gjithmonë i njëjtë,një qytet i pastër për të gjithë.
Le të mos harrojmë se pas çdo rruge të pastër, çdo sheshi të rregullt dhe çdo kontejneri të zbrazur qëndron një dorë punëtori – një hero i heshtur i jetës së përditshme.
(Struga Ekspres)
