Një sasi eksplozivi i është vendosur këtë të martë rreth orës 03:00 të mëngjesit një salloni makinash me qira në qytetin e Kuçovës.
Shpërthimi ka qenë me telekomandë dhe dyshohet për një sasi prej 2 kallëpesh.
Nga shpërthimi ka pasur vetëm dëme materiale, ndërkohë që biznesi rezulton në pronësi të Gëzim Skënderaj, i cili nuk njihet si person me precedentë penal.
Burime të policisë konfirmuan se nga këqyrja e kamerave të sigurisë përreth këtij biznesi, shihet një person me kapuç që hyn nga hekurat e derës brenda biznesit, lë lëndën plasëse në tokë dhe largohet.
Ndërkohë disa minuta më vonë ajo shpërthen.
Në vendngjarje kanë shkuar forca të shumta policie nga Drejtoria Vendore e Policisë Berat dhe Njësia Anti-Tritol e Drejtorisë së Përgjithshme të Policisë së Shtetit. Sipas policisë po hetohet në disa pista të mundshme, që ende nuk bëhen të ditura.
Pronari i biznesit, Gëzim Skënderaj ka 4 vëllezër. Ai dhe një prej vëllezërve kanë punuar dhe jetuar prej shumë vitesh në Itali dhe disa vite më parë janë kthyer në Kuçovë ku kanë investuar në disa banesa e biznese. Vëllai tjetër është polic bashkiak ndërsa i fundit ka qënë i dënuar në Gjermani dhe tani është i dënuar në Shqipëri për “Trafikim të lëndëve narkotike”.
