Një udhëtim muzikor, nga veriu në jug e sigurisht edhe me notat e Shqipërisë së mesme, kështu zgjodhi të vinte këngëtarja Blerina Braka, në “Këngë moj”.
Me elegancën dhe zërin e saj brilant Blerina është bërë shpesh pjesë e spektaklit, por këtë herë mbrëmja iu dedikua tërësisht karrierës së saj artistike.
“E doja shumë këtë natë dhe kur më erdhi ftesa nuk e prisja dhe thash erdhi 2024 me mbarësi. Nata e sotme është një recital i këngëve popullore janë pikërisht këngët që do populli. Do të jenë këngë nga të gjitha trevat, sepse ai që është artist i bën të gjitha.”, tha këngëtarja Blerina Braka.
Miq të jetës së artistes, por edhe ata që e shoqërojnë në skenë, iu bashkuan Blerinës në gjallërinë dhe atmosferën e veçantë që sollën së bashku.
“Unë e kam njohur që në akademinë e arteve blerinën dhe është një nga vokalet më të bukura të tregut shqiptar. Por Blerina është një vajzë e drejtpërdrejtë që e ndërthur shumë bukur njerëzoren me artin.”, tha këngëtari Aurel Thëllimi.
“Jemi të dy temperamente besoj në këngë që nuk këndon vetëm Blerina këngët e jugut ashtu siç nuk këndoj vetëm unë këngët e veriut.”, deklaroi këngëtari Ervin Bushati.
Interpretime që emocionuan e çuan peshë edhe publikun ishin edhe duelet e Blerinës me Eglantina Toskën dhe Shpat Kasapin.
“Skena të bën të ndjehesh më i frymëzuar, më planë publikut si dhe ti japësh atij emocionet e duhura.”, shtoi më tej këngëtari Shpat Kasapi.
Çdo të enjte në orën 21:00 mund të ndiqni “Këngë Moj” në Vizion Plus për të shijuar muzikën e zgjedhur dhe artistët më të mirë të skenës shqiptare./vizionplus.tv
