Marina franceze kapi 2.4 ton kokainë nga një anije peshkimi që lundroi nga Venezuela në Oqeanin Atlantik, rreth 1500 kilometra në verilindje të Martinikut, njoftoi të hënën komanda e misionit të forcave të armatosura franceze në Antile. (Forces armées aux Antilles, FAA).
Operacioni u krye nga ekuipazhi i fregatës Ventôse, në bazë të informacionit të transmetuar nga Drejtoria e Përgjithshme e Doganave dhe agjencia e zbatimit të drogës OFAST, shpjegoi në Facebook komanda e forcave të armatosura franceze në Antile.
Trafiku i drogës ka qenë veçanërisht intensiv në harkun Antile-Guajanë vitet e fundit, pasi trafikantët përdorin çdo drejtim të mundshëm për të transportuar sasi gjithnjë në rritje droge nga Amerika e Jugut në tregjet evropiane dhe amerikane.
Në vitin 2022 u kapën 27.7 ton kokainë, sipas të dhënave të fundit nga autoritetet franceze, një sasi e rritur me 5% krahasuar me vitin 2021. Sasia është pesëfishuar në dhjetë vjet. /vizionplus.tv
