Gratë që ikin nga vendet e tyre për shkak të dhunës në familje mund të marrin statusin e refugjatit në Bashkimin Evropian, vendosi sot Gjykata e Drejtësisë së Bashkimit Evropian.
Gjykata e Drejtësisë së Bashkimit Evropian (GJED) tha në një deklaratë se gratë mund të kualifikohen për statusin e refugjatit në rastet kur, në vendin e tyre të origjinës, ato ekspozohen “për shkak të seksit të tyre, ndaj dhunës fizike ose mendore, duke përfshirë dhunën seksuale dhe dhunën në familje”.
Çështja e dëgjuar nga GJED kishte të bënte me një grua kurde të divorcuar nga Turqia. Gruaja tha se ishte detyruar të martohej nga familja e saj dhe se burri e kishte rrahur dhe kërcënuar.
Gruaja muslimane tha se kishte frikë se burri i saj do ta vriste nëse ajo kthehej në Turqi dhe kërkonte mbrojtje ndërkombëtare në Bullgari. Gjykata bullgare e dërgoi çështjen në GJED.
Në vendim, GJED sqaron se dhuna ndaj grave, bazuar në gjininë e tyre, përbën një formë përndjekjeje dhe se sipas këtij përkufizimi ato përbëjnë edhe një grup shoqëror.
GJED-ja nuk tha nëse aplikantët për të marrë mbrojtje ndërkombëtare, si në rastin e kurdes, duhet të njihen si refugjatë apo t’u jepet mbrojtje shtesë.
Kushdo që persekutohet për arsye race, feje, kombësie, bindjesh politike ose për shkak se është anëtar i një grupi të caktuar shoqëror mund të njihet si refugjat.
Mbrojtja plotësuese zbatohet për njerëzit që nuk njihen si refugjatë, por ka arsye për të besuar se ata do të përballen me dëmtime serioze nëse kthehen në vendet e tyre të origjinës.
Gjykata bullgare tani duhet të vendosë për çështjen e kurdes sipas vendimit të GJED-së. /vizionplus.tv
