Nata po bie në Kiev pas ditës së tretë të luftimeve në të gjithë Ukrainën.
Qyteti ka qenë nën një shtetrrethim të vendosur nga kryebashkiaku Vitali Klitschko që nga ora 17:00 me orën lokale.
Zyrtarët e mbrojtjes në Mbretërinë e Bashkuar thonë se trupat ruse kanë avancuar brenda 30 km nga qyteti.
Por presidenti, Volodymyr Zelensky mbetet aty dhe shpesh ka publikuar mesazhe sfiduese nga zyra e tij dhe me trupat.
Në mëngjes ai deklaroi se kryeqyteti i vendit të tij i “mbijetoi një natë tjetër” nën sulmin rus.
Tingujt e luftës duket se po afrohen gjithnjë e më shumë në Kiev, me një seri shpërthimesh me një distancë prej rreth pesë minutash.
Forcat ruse janë ende në buzë të qytetit, duke u përpjekur të përparojnë kryesisht nga drejtimet veriore dhe lindore, por ato ende po përballen me rezistencën e forcave ukrainase.
Tani në orët e pasdites, ministria ruse e Mbrojtjes urdhëroi forcat ruse për një sulm të gjithanshëm në Ukrainë.
Zëdhënësi i Ministrisë së Mbrojtjes në Rusi, Igor Konashenkov, tha se “pas refuzimit të Kievit për të negociuar, të gjitha njësitë u urdhëruan të nisnin një ofensivë në të gjitha drejtimet”.
Kështu Autoritetet e Kievit vendosën një shtetrrethim ditë e natë deri të hënën e 28 shkurtit në mëngjes.
Nga ana tjetër, Ukraina ka mohuar refuzimin e negociatave me Rusinë, siç pretendoi Kremlini zyrtar.
Shefi i zyrës së presidentit, Mikhail Podolyak, tha se ishte e pavërtetë.
Ai shtoi se Rusia kishte vendosur “kushte, kërkesa dhe ultimatume të papranueshme”.
“Ukraina, natyrisht, nuk i refuzoi negociatat. Ukraina dhe presidenti Zelensky heqin dorë kategorikisht nga çdo kusht të papranueshëm ose kërkesë ultimatum nga pala ruse”, tha Podolyak.
Vetë Zelensky, duke komentuar propozimin e Moskës, tha se ishte gati për negociata që do t’i jepnin shtetit garanci për sigurinë e saj.
