Deri në fillimin e vitit shkollor 2026/2027, Ministria e Arsimit dhe Shkencës do ta rrisë mesataren e numrit të nxënësve për një mësues. Qëllimi është që nga 10 nxënës sa janë tani, të shkohet në 20 nxënës për një mësues. Kjo është parashikuar edhe sipas minimumit ligjor që duhet për të funksionuar një klasë në shkolla. Megjithëse numri më i vogël i nxënësve në klasë pritet të sjellë rezultate më të mira, kjo nuk ka ndodhur në Maqedoni, ku rezultatet e testimeve janë të dobëta, ndërsa raporti mësues/nxënës është nën mesataren evropiane. Në Bashkimin Evropian mesatarja është rreth 14 nxënës për një mësues.
Raporti Mësues/Nxënës
Shteti/Rajoni — Nxënës për një mësues
Maqedonia: 10
BE mesatarja: 13,6–15
Greqia: 8,7
Luksemburgu: 9
Polonia: 9,6
Mbretëria e Bashkuar: 19,9
Sipas ministres Vesna Janevska, ndryshime të tilla dhe respektimi i ligjit nuk do të sjellin shkarkime të mëdha të mësuesve.
“Koncepti lejon që mësuesit që nuk kanë numër të mjaftueshëm orësh të angazhohen në projekte, aktivitete jashtëmësimore, në klube. Në këtë mënyrë, besoj se shkarkimet do t’i ulim në minimum. Për më tepër, Byroja për Zhvillimin e Arsimit, Qendra Shtetërore e Provimeve, Qendra për Arsimin e Mesëm Profesional, Qendra për Arsimin e të Rriturve – nuk kanë staf. Edhe atyre u nevojiten mësues me përvojë. Ky staf, gjatë vitit të ardhshëm, kur do ta forcojmë reformën për optimizim dhe zvogëlim të klasave me pak nxënës, do të ridrejtohet atje”, u shpreh ministrja e Arsimit dhe Shkencës, Vesna Janevska.
Përveç kësaj, nuk do të ketë shkarkime edhe për faktin se planifikohet ridrejtim i një pjese të mësuesve në mësimin e plotëditor, ku do të ketë dy mësues në një klasë, si dhe rikualifikim të mësuesve të lëndëve në mësues klasash.
Klasa të vogla do të mbeten vetëm në vendet ku shkolla më e afërt është mbi 40 kilometra larg. Përndryshe, kjo reformë gjeti përkrahje edhe nga Federata e sapoformuar e Sindikatave të Pavarura në Ministrinë e Arsimit dhe Shkencës. Edhe prej aty thonë se ka shkolla me tepricë të punësimeve, ndërsa cilësia e arsimit bie.
“Ka mësues që nuk duhet të jenë mësues. Do të thotë, mësues joadekuat kanë marrë ndonjë diplomë për t’u bërë mësues, ose kemi mësues që nuk kanë mbaruar pedagogji apo ndonjë lëndë tjetër përkatëse – vetëm janë regjistruar në fakultet dhe tashmë janë bërë mësues”, tha Jovan Gjorgjioski – Federata e Sindikatave të pavarura në MASH.
Sindikata e re sot, në ditën e parë të themelimit të saj, kërkoi transformimin e vendeve të përkohshme të punës në të përhershme. Ata pretendojnë se disa të punësuar presin 10 deri në 20 vjet për një vend pune të përhershëm.
“Mësuesit që prej shumë vitesh punojnë me fond të plotë orësh, e nuk janë transformuar, duhet të transformohen. Por ndodh që në disa shkolla fondi i orëve të ndahet, p.sh. nga 10 orë, ndërkohë që ligji parashikon 20–24 orë, vetëm që të punësohen dy mësues. Prej këtu vjen edhe teprica e mësuesve, për të cilët unë flas jo vetëm si ministre, por kam folur edhe si opozitë tashmë 3–4 vite, sepse dikush duhej të kishte guximin të hapte këtë çështje”, shtoi Vesna Janevska – ministre e Arsimit dhe Shkencës.
Ministrja theksoi se kërkesat për transformimin e vendeve të punës i dorëzojnë komunat. /Tv21
The post 20 nxënës për një mësues – MASH do ta rrisë mesataren e numrit të nxënësve për një mësues appeared first on Telegrafi.
