Ministri i Shëndetësisë Azir Aliu, sot këmbënguli se është zgjidhur problemi me punësimin e përhershëm të 155 motrave medicinale dhe personeli mjekësor në Spitalin e Tetovës.
Ministri Aliu tha se është jonjerëzore që të luhet me fatin e 155 personave, për të cilët siç tha, problemi tashmë është zgjidhur, përcjell Telegrafi Maqedoni.
“Sot bashkëbiseduam me 155 tashmë të punësuar full time në Spitalin e Tetovës. Jam i lumtur që takohemi sërish me zgjidhjen e problemit që e kishim. Një pjesë e motrave kanë punuar për 2 vite edhe pa rroga”.
“Nuk është e vërtetë që Fondi ka dhënë mendim negativ. Nëse ministri del në konferencë dhe thotë se e ka zgjidhur problemin, kjo nënkuptohet. Jam institucion para juve dhe jam njeri me kredibilitet dhe them se 155 personat i kanë kaluar të gjitha filtrat dhe ka ngelur vetëm testimi administrativ i tyre”.
“Të mbyllet një proces dhe ky të zhbëhet me një lajm fake, është jonjerëzore. Këto persona 155 që janë pas meje, të abuzosh me ato, kur e kanë të zgjidhur problemin, është jonjerëzore”, tha mes tjerash Aliu.
Ndryshe, ditë më parë u publikua dokumenti në të cilin shihej se Fondi për Sigurim Shëndetësor ka dhënë mendim negativ për punësimin e përhershëm të 155 personave në Spitalin e Tetovës./Telegrafi/
The post Aliu: Është zgjidhur problemi me 155 të punësuarat në Spitalin e Tetovës, është jonjerëzore të abuzohet me fatin e tyre appeared first on Telegrafi.