BDI mbështet mbylljen e menjëhershme dhe të tërësishme të kazinove dhe bastoreve.
Një nga përcaktimet programore të Bashkimit Demokratik për Integrim, thuhet në kumtesën e BDI-së, është mbyllja e tërësishme e të gjitha objekteve për organizimin e lojërave të fatit, kazinove dhe bastoreve në vendin tonë.
“Në mandatin e kaluar, BDI dhe Qeveria propozuan ligj, i cili u mbështet edhe nga shoqata anti-bixhoz, për dislokimin e kazinove dhe bastoreve në minimum 500 metra nga shkollat dhe objektet fetare si dhe ashpërsimin e kushteve për licencim dhe rritjen e tatimeve ndaj organizatorëve.
Ky ligj nuk i përmbushte tërësisht pritjet tona edhe të qytetarëve, për arsye se angazhimi jonë që nga dita e parë është mbyllja e tërësishme e kazinove dhe bastoreve.
Ligji u bllokua gati 3 vite nga opozita e atëhershmë, por më në fund u votua dhe u miratua nga Kuvendi, pa përkrahjen e deputetëve që sot janë pjesë e VLEN.
Asokohe, ish Presidenti Pendarovski nuk e firmosi ligjin. Në rivotimin pas kthimit të ligjit nga Pendarovski, deputetët që sot janë pjesë e VLEN, nuk votuan për miratimin e ligjit dhe mundësuan vazhdimin e funksionimit të kazinove dhe bastoreve”, thonë nga BDI.
Nga atje shtojnë se deputetët e BDI dhe të Frontit Europian mbështesin mbylljen e tërësishme dhe të menjëhershme të të gjitha lojërave të fatit në vendin tonë./Telegrafi/
The post BDI: Mbështesim dhe kërkojmë mbylljen e menjëhershme dhe të tërësishme të kazinove dhe bastoreve appeared first on Telegrafi.