BDI akuzon koalicionin VLEN se në programin zgjedhor të vitit 2024 premtoi themelimin e Bankës shqiptare me kapital dominues shqiptar, si garanci për fuqizimin ekonomik të shqiptarëve dhe zhvillimin e barabartë rajonal. Mirëpo sot, thonë nga BDI, VLEN ka hapur dyert për penetrimin e “Botës Serbe” në sektorin bankar të Maqedonisë së Veriut përmes “Alta Bank”.
“Ky nuk është investim i zakonshëm financiar, por projekt i drejtpërdrejtë politik dhe ekonomik i Beogradit për të marrë nën kontroll institucionet strategjike të vendit. Banka nuk është thjesht një kompani private, ajo është mekanizëm për ndikim politik, për pastrim kapitalesh dhe për krijimin e varësisë ekonomike të vendit nga interesat e Serbisë.
Faktet janë të qarta:
Parashikimi i Maja Kadievska Vojnoviq, ish-anëtare e OBRM-PDUKM-së, në krye të bankës, është rezultat i lobimit personal të Mickoskit te Vuçiq.
Profesionalistët e sektorit financiar kanë paralajmëruar për rrezikun e reputacionit të vendit para BE-së dhe institucioneve ndërkombëtare, qeveria dhe institucionet e sigurisë kanë heshtur.
Presidentja dhe kabineti i saj po relativizojnë problemin, duke e paraqitur si investim “normal”, ndërkohë që të gjithë e dinë se është instrument politik i “Botës Serbe”.
Në vend që të garantojnë kapital shqiptar dhe zhvillim ekonomik të barabartë, VLEN dhe partnerët e saj po e dorëzojnë sektorin bankar, zemrën e ekonomisë, në duart e Beogradit.
Kjo nuk është çështje ekonomike, por çështje sigurie kombëtare. Banka serbe do të thotë ndikim serb mbi kreditë, bizneset dhe vendimmarrjen financiare në vend. Do të thotë kontroll i sektorëve strategjikë dhe dobësim i orientimit euroatlantik”, akuzojnë nga BDI./Telegrafi/
The post BDI: VLEN premtoi themelimin e bankës shqiptare, mirëpo sot po sjell bankën serbe appeared first on Telegrafi.