Ky ribalancim nuk është zhvillimor dhe nuk është shoqërisht përgjegjës. Është krijimi i një sërë të re mundësish të humbura, borxhesh të fshehura, mbështetjeje selektive dhe llogaritjesh politike afatshkurtra. Ky është një ribalancim për ryshfet parazgjedhor, shërben vetëm për zgjedhjet në tetor, tha deputeti i LSDM-së, Fatmir Bytyqi, në debatin e sotëm parlamentar kushtuar ribalancimit të buxhetit për vitin 2025.
Bytyqi, në fjalën e tij, theksoi se deficiti buxhetor mbetet në 41.3 miliardë denarë, ose 4% të BPV-së.
“Por kjo është tashmë mbi kufirin e lejuar me ligj prej 3%, ose një maksimum prej 3.5% në raste të jashtëzakonshme dhe sot nuk kemi as katastrofë dhe as tronditje globale. Ajo që kemi është një krizë në planifikim, një krizë në llogaridhënie dhe një krizë në sistemin e vlerave përmes të cilit krijohen politikat ekonomike në vend”, theksoi Bytyqi.
Ai shtoi se deficiti vetëm nga fundi i prillit deri në mesin e korrikut është më shumë se dyfishuar nga 13.4 në mbi 30 miliardë denarë, që është një shenjë e qartë se kontrolli fiskal është humbur dhe shpenzimet publike po rriten në mënyrë joproduktive.
Bytyqi theksoi se ribalancimi rrit huamarrjen, si të brendshme ashtu edhe të jashtme, gjë që krijon një barrë për brezat e ardhshëm, dhe çdo obligacion i ri dhe çdo kredi e re do të thotë më pak para për shkollat, kujdesin shëndetësor dhe infrastrukturën./Telegrafi/
The post Bytyqi: Buxhet i pazhvilluar për ryshfet parazgjedhor, qeveria indiferente ndaj nevojave reale të qytetarëve appeared first on Telegrafi.
