Estonia, Letonia dhe Lituania njoftojnë se diplomatët e tyre të lartë nuk do të marrin pjesë në takimin e OSBE-së në Shkup, për shkak të vendimit për të lejuar pjesëmarrjen e ministrit të jashtëm rus Sergej Lavrov.
Në një deklaratë të përbashkët, ministrat e jashtëm baltik thonë se prania e planifikuar e Lavrov “rrezikon legjitimimin e Rusisë agresore si një anëtar legjitim i komunitetit të kombeve të lira”, duke shtuar se ata kanë vendosur të mos merrnin pjesë në takimin në kryeqytetin e Maqedonisë së Veriut.
Lavrov tha të hënën se Maqedonia, e cila iu bashkua sanksioneve perëndimore për pushtimin e Ukrainës nga Moska, kishte rënë dakord ta lejonte të merrte pjesë në takimin vjetor të organit pan-evropian të sigurisë, anëtare e të cilit është Rusia, përcjell Telegrafi Maqedoni.
Media shtetërore ruse raportoi se Bullgaria anëtare e BE-së, kishte informuar Moskën se do të lejonte aeroplanin e Lavrov të kalonte hapësirën e saj ajrore në rrugën për në Shkup.
Ndërsa sot, Ukraina tha se do të “bojkotonte” takimin për shkak të ftesës së Lavrov, gjë që u ndoq edhe nga shtetet baltike.
Dmytro Kuleba nuk do të merr pjesë në takimin ministror të OSBE-së në Shkup
“Prania e Lavrov i banalizon krimet mizore që Rusia vazhdon të kryejë” tha ministri i jashtëm estonez Margus Tsachna në një takim të ministrave të jashtëm të NATO-s në Bruksel.
“Vendi i Lavrov është në gjykatë speciale, jo në tryezën e OSBE”, shtoi ai, duke shpjeguar lëvizjen e përbashkët të vendeve baltike për të anashkaluar takimin.
Vitin e kaluar, Polonia mikpritëse e OSBE-së refuzoi të lejonte Lavrovin të merrte pjesë, duke shkaktuar përgjigje të zemëruar nga Rusia./Telegrafi/
Estonia, Letonia dhe Lituania gjithashtu bojkotojnë Samitin e OSBE-së në Shkup për shkak të Rusisë shkruan Telegrafi.