Prokuroria do të kryejë kontrolle mbi punën e Ndërmarrjes Publike “Higjiena Komunale”, ndërsa inspektimet e jashtëzakonshme në terren do të duhet të ndërmarrin një sërë aktivitetesh për shkak të situatës alarmante me mbeturinat në Shkup. Ndërkohë, komunat e Shkupit vazhdojnë të jenë të zhytura në grumbuj mbeturinash, ndërsa banorët e kryeqytetit kanë frikë nga sëmundjet dhe infeksionet.
Kryetarja aktuale e bashkisë, Danela Arsovska, e cila ka qenë në hije gjatë periudhës së kaluar, pas incidenteve dhe sulmit në Çair të Shkupit, është rikthyer në vëmendjen e publikut, me debate të ashpra me kryeministrin Hristijan Mickoski. Edhe këtë herë, si shumë herë më parë, grindja është për përgjegjësitë – kush duhet ta pastrojë qytetin nga grumbujt e mbeturinave që janë një vatër e infeksionit të mundshëm?
“Mirëmëngjes z. Mickoski. Problemi me mbeturinat është një temë absolute, së bashku me stafin tuaj e krijoni dhe vazhdimisht krijoni kaos, të cilin për shkak se jeni “të aftë” do ta “zgjidhni” për 72 orë. Le të përfundojmë – meqenëse zgjidhet për 72 orë, ishte e lehtë ta zgjidhnim, nuk e di çfarë prisnit deri më tani, ju kam thirrur shumë herë në interes të qytetarëve për të bashkëpunuar”, thotë Arsovska në një postim në rrjetet sociale.
Reagimi vjen pasi Qeveria urdhëroi disa institucione të marrin masa urgjente për të zgjidhur problemin e mbledhjes dhe transportimit të mbeturinave komunale në territorin e Bashkisë së Shkupit.
Inspektorati Shtetëror Komunal, Inspektorati Shtetëror i Mjedisit, Inspektorati Shtetëror Sanitar dhe Shëndetësor dhe Instituti i Shëndetit Publik, në bashkëpunim me Ministrinë e Punëve të Brendshme, duhet të kryejnë inspektim të jashtëzakonshëm në territorin e Bashkisë së Shkupit, me qëllim përcaktimin e gjendjes me mbeturinat komunale dhe llojet e tjera të mbeturinave dhe ndërmarrjen e masave dhe aktiviteteve përkatëse.
MPB nga ana tjetër, në bashkëpunim me institucionet kompetente, duhet të shqyrtojë punën e Ndërmarrjes Publike Higjiena Komunale-Shkup dhe Kryetares së Bashkisë së Shkupit në lidhje me mosmbledhjen e mbeturinave komunale, të cilat paraqesin rrezik për shëndetin e njerëzve.
“Hajde, hajde, policia financiare dhe MPB, me urdhër tuaj, po bastisin urgjentisht institucionet dy ditë pasi shoku juaj i partisë e raporton. Pra, çdo gjë ishte e mundur. Dhe unë kam raportuar për më shumë se 6 muaj dhe pres në Çair me ju dhe institucionet tuaja së bashku për t’ju treguar krimin personalisht”, komentoi Arsovska në një mesazh drejtuar kryeministrit./DW/